ഒരു കയ്യിൽ മാലയും മറുകയ്യിൽ ഭാലയും - ആത്മീയതയുടെ കർമ്മകാണ്ഡം

 ഒരു കയ്യിൽ മാലയും മറുകയ്യിൽ ഭാലയും

നാഗ സന്യാസിമാർ - ആത്മീയതയുടെ കർമ്മകാണ്ഡം

പരമപൂജ്യ മഹാമണ്ഡലേശ്വർ സ്വാമി ആനന്ദവനം ഭാരതി

മലയാളിക്ക് കുംഭമേള എന്തെന്ന് മനസിലാക്കിക്കൊടുത്തയാൾ

മഹാമണ്ഡലേശ്വർ സ്വാമി ആനന്ദവനം ഭാരതി -പൂർവ്വാശ്രമത്തിൽ ക്ഷുഭിതയൌവ്വനത്തിളപ്പിൽ സമൂഹത്തെ മാറ്റത്തിന്റെ പാതയിൽ കൊണ്ടുവരുവാൻ മാർക്സിസ്റ്റ് പാർട്ടിയുടെ സജീവ പ്രവർത്തകനായി പരിശ്രമിച്ചയാളാണ്. എസ് എഫ് ഐ നേതാവ്, ട്രേഡ് യൂണിയൻ പ്രവർത്തകൻ എന്നീ നിലകളിലെല്ലാം രാഷ്ട്രീയത്തിന്റെ എല്ലാത്തരം പ്രവർത്തനങ്ങളിലും – കയ്യാങ്കളിയടക്കം, പയറ്റിത്തെളിഞ്ഞ ആളാണ് ഇപ്പോൾ ജൂനാ അഖാഡയുടെ മഹാമണ്ഡലേശ്വർ ആയി അവരോധിക്കപ്പെട്ട് ദക്ഷിണഭാരതത്തിന് പുതിയൊരു ആത്മീയ ഉണർവ്വു നല്കാൻ നിയുക്തനായിരിക്കുന്നത്. അറിയപ്പെടുന്ന പത്രപ്രവർത്തകൻ - ജേർണലിസത്തിൽ റാങ്ക് നേടിയ ആളാണ്, ഗ്രന്ഥകാരൻ, ഇപ്പോളിതാ സത്യാന്വേഷി, കഠിനമായ ആചാരാനുഷ്ഠാനങ്ങളിലൂടെ നാഗസന്യാസപരമ്പരയിലെത്തി സമൂഹത്തിനായി സ്വയം സമർപ്പിച്ചയാൾ.

സന്യാസിമാരുടെ കൈകളിൽ ഒന്നിൽ മാലയും മറ്റേതിൽ ഭാലയും (ആയുധവും) ഉണ്ടെങ്കിൽ മാത്രമേ കർമ്മസന്യാസിയായി സമൂഹത്തെ സേവിക്കുവാനാവൂ എന്ന ബോദ്ധ്യത്തിൽ പന്ത്രണ്ട് വർഷത്തെ കഠിനപരിശീലനങ്ങൾക്കു ശേഷം ജൂനാ അഖാഡയിൽ ചേർന്ന ആളാണ് സ്വാമി ആനന്ദവനം ഭാരതി. പതിമൂന്ന് അഖാഡകളാണ് കുംഭമേളയിലെ പ്രധാന സന്യാസി സമൂഹം. അഖാഡ എന്ന് പറഞ്ഞാൽ ‘കളരി’ എന്ന് മലയാളത്തിൽ പറയാമെന്ന് തോന്നുന്നു. കർമ്മ സന്യാസികളാണ് അവയിലുള്ളത്. അഖാഡകളിൽ ലക്ഷക്കണക്കിന് സന്യാസിമാരും മറ്റ് അംഗങ്ങളും ഉണ്ട്. അതിൽ ജൂനാ അഖാഡയിൽ മാത്രം ഇത്തവണത്തെ കുംഭമേളയിൽ പതിനായിരം പേർ സന്യാസം സ്വീകരിച്ചു. ആദിശങ്കരൻ ഉത്തരഭരതത്തിലേക്ക് സഞ്ചരിച്ച് ഭാവന ചെയ്ത അഖാഡ സമ്പ്രദായത്തിൽ കേരളത്തിൽ നിന്നുള്ള ചുരുക്കം ചിലർ മാത്രമേയുള്ളൂ. കേരളത്തിൽ നിന്നുള്ള നാഗസന്യാസി ആനന്ദവനം ഈ കുംഭമേളയിൽ വച്ച് ജൂന അഖാഡയിലെ മഹാമണ്ഡലേശ്വർ ആയി സ്ഥാനമേറ്റതോടെ, ശങ്കരാചാര്യർ സന്യാസ സമ്പ്രദായങ്ങൾ സ്ഥാപിച്ചിട്ട് പിന്നീട് അദ്ദേഹത്തിന്റെ നാട്ടിൽ നിന്നും ആരും തന്നെ ഇങ്ങോട്ട് തിരിഞ്ഞു നോക്കിയിട്ടില്ല എന്ന നോർത്ത് ഇൻഡ്യക്കാരുടെ പരാതി തീർക്കുവാനും ഈ മഹാമണ്ഡലേശ്വർ പദവിയ്ക്ക് സാധിക്കുന്നുണ്ട്.

കുംഭമേളയിൽ ജൂനാ അഖാഡ കാളികാ പീഠത്തിലെ ശ്രീചക്രപൂജ.

കുംഭമേളയിൽ സ്വാമിജിയുടെ ശിബിരത്തിൽ ലേഖകനും ഡോ ധർമ്മപാലനും

ഇക്കഴിഞ്ഞ പ്രയാഗ് രാജ് – മഹാകുംഭമേളയിലൂടെ ദക്ഷിണഭാരതത്തെ, പ്രത്യേകിച്ച് കേരളത്തെ രാജ്യത്തിന്റെ മുഖ്യധാരയിലേക്ക് കൊണ്ടുവരാൻ നിമിത്തമായത് സ്വാമി ആനന്ദവനത്തിന്റെ പ്രവർത്തനങ്ങളാണ്. ലോകത്തിലേയ്ക്കും വച്ച് ഏറ്റവും വലിയ ജനക്കൂട്ടം പങ്കെടുക്കുന്ന ഒരു സാംസ്കാരിക, ആത്മീയ ആഘോഷം; ചരിത്രപരമായും പുരാണപരമായും ഭാരതത്തിന്റെ ദേശീയതയിൽ അലിഞ്ഞുചേർന്ന കൂട്ടായ്മ, 144 വർഷത്തിൽ ഒരിക്കൽ മാത്രം സംഭവിക്കുന്ന നക്ഷത്ര-ഗ്രഹനിലകളുടെ ദിവ്യ മുഹൂർത്തനാളുകൾ, എന്നിങ്ങിനെ അത്യപൂർവ്വമായ ഒരു പ്രതിഭാസത്തിൽ മലയാളികളെ പങ്കാളികളാക്കുക, അവരെ ദേശീയതയിൽ അഭിമാനമുള്ളവരാക്കുക എന്നതായായിരുന്നു സ്വാമിജിയുടെ ലക്ഷ്യവും നിയോഗവും. ഏതാണ്ട് 65 കോടി ജനങ്ങൾ രണ്ടുമാസത്തിൽ പ്രയാഗ്രാജിൽ വന്ന് മേളയിൽ പങ്കെടുത്തു എന്നതാണ് ഔദ്യോഗികമായ കണക്ക്. അമേരിക്കൻ ജനസംഖ്യയുടെ ഇരട്ടി ആളുകൾ! സാധാരണയായി കുംഭമേളകൾക്ക് ഒന്നോ രണ്ടോ ആയിരം മലയാളി സാന്നിദ്ധ്യമേ ഉണ്ടാവാറുള്ളൂ. എന്നാൽ ഇത്തവണ അത് രണ്ടു ലക്ഷത്തോളമായി എന്നാണറിഞ്ഞത്. ഇതിന് കാരണക്കാരനായത് സ്വാമി ആനന്ദവനം തന്നെയാണ്

ലോകത്തെ വിവിധ രാജ്യങ്ങളിൽ നിന്നുള്ള അനേകം പേരെ സ്വാമിജിയുടെ നേതൃത്വത്തിൽ ജൂനാ അഖാഡ – കാളികാപീഠത്തിന്റെ കൂടാരങ്ങളിൽ ദിവസവും നൂറോളം പേർക്ക് താമസസൌകര്യവും, മൂന്നുനേരം ഭക്ഷണവും ഒരുക്കിയിരുന്നു. കാളികാപീഠത്തിന്റെ യജ്ഞശാലയിൽ വിവിധ സംഘടനകൾ നടത്തുന്ന യാഗങ്ങളും പഠനശിബിരങ്ങളും നടത്തുന്നതിന്റെ നേതൃത്വവും സ്വാമിജിക്കായിരുന്നു.

കുംഭമേളയിൽ അദ്ദേഹത്തിന്റെ കുടിലിൽ നാലുദിവസം താമസിച്ചു നാലിടങ്ങളിൽ മുങ്ങിക്കുളിക്കുവാൻ എനിക്കു സാധിച്ചു. ഓരോദിവസവും മേളാ നഗരിയിൽ ഇരുപതു കിലോമീറ്ററിൽ അധികം നടന്നും ഓരോ ആശ്രമശിബിരങ്ങളിലും കയറിയിറങ്ങിയും കുംഭമേളയിൽ പങ്കെടുത്ത എനിക്ക് ഏറെ പ്രചോദനമായത് സ്വാമിജിയുടെ സാന്നിദ്ധ്യവും നിർദ്ദേശങ്ങളുമാണ്.

വിപ്ലവത്തിന്റെ ചൂടിൽനിന്നും എങ്ങിനെ സന്യാസത്തിന്റെ പാതയിലേക്ക് എത്തി എന്ന് അദ്ദേഹത്തോട് ചോദിച്ചപ്പോൾ, “വായനയുടെയും സ്വതന്ത്രചിന്തയുടെയും വാതായനങ്ങൾ പരക്കെ തുറന്നപ്പോൾ പരിമിതവീക്ഷണങ്ങൾ മാത്രമുള്ള ഇസങ്ങളിൽ ആരും കുടുങ്ങിക്കിടക്കേണ്ടതില്ലായെന്ന തിരിച്ചറിവാണ് നമ്മെ സന്യാസത്തിലേക്ക് നയിച്ചത്” എന്നാണ് പറഞ്ഞത്. ഈ തിരിച്ചറിവ് ചിലർക്ക് നേരത്തേയുണ്ടാവും. ചിലർക്ക് ഏറെ വൈകിയും!

കേരളമൊഴികെ, രാജ്യത്തിന്റെ എല്ലാ സംസ്ഥാനങ്ങളിൽ നിന്നും സർക്കാർവകയായും സംഘടനകൾ, ആശ്രമങ്ങൾ എന്നിവയുടേതായും ധാരാളം സ്റ്റാളുകളും ടെന്റ്കളും താമസസൌകര്യങ്ങളും ഉണ്ടായിരുന്നു. കേന്ദ്രവുമായി നിരന്തരം മല്ലിടുന്ന തമിഴ്നാടുപോലും അവരുടെ സാന്നിദ്ധ്യം നന്നായി അവതരിപ്പിച്ചിരുന്നു. “ദൈവത്തിന്റെ സ്വന്തം നാട്” എന്നൊരു ടൂറിസ്റ്റ് പരസ്യം പോലും വയ്ക്കാൻ കേരളത്തിന് കഴിഞ്ഞില്ല. മേള അധികാരികൾ തിരുവനന്തപുരത്ത് പോയി നേരിട്ട് ക്ഷണിച്ചിരുന്നു എന്നാണ് അറിഞ്ഞത്.

കേരളത്തിലെ പ്രധാനപ്പെട്ട മൂന്നു മുന്നണികളും പ്രകടനപത്രികയിൽ അവരവരുടെ നിലപാട് വ്യക്തമാക്കണം – സ്വാമി ആനന്ദവനം

മാഘ പൗർണ്ണമി സ്നാനത്തിനു ശേഷം നൽകിയ സത്സംഗ - അഭിമുഖത്തിൽ. ജൂന അഖാഡയുടെ തെക്കേ ഇന്ത്യൻ പ്രവർത്തനങ്ങൾക്ക് നേതൃത്വം നൽകുന്ന മഹാമണ്ഡലേശ്വർ സ്വാമി ആനന്ദവനം കേരളത്തിലെ മൂന്നു മുന്നണികളും ഭാരതീയ സംസ്കാരത്തേയും ഹിന്ദു ആചാരങ്ങളേയും അവഗണിക്കുന്ന തരത്തിലാണ് പ്രവർത്തിച്ചുവരുന്നതെന്ന് സൂചിപ്പിക്കുകയുണ്ടായി. ഉത്തർപ്രദേശ് സർക്കാർ ഡെലിഗേഷനെ വിട്ട് കുംഭമേളയ്ക്ക് പങ്കെടുക്കാൻ കേരള സർക്കാരിനെ ക്ഷണിക്കുകയുണ്ടായി. ടൂറിസം പ്രമോഷനു വേണ്ടിപ്പോലും സർക്കാർ അറുപതുകോടി ജനങ്ങൾ പങ്കെടുക്കുന്ന, ലോകത്തിലെ ഏറ്റവും വലിയ മനുഷ്യ സംഗമത്തിൽ പങ്കെടുക്കുകയുണ്ടായില്ല.

കേരളത്തിൽ നിന്നും കുംഭമേളയിൽ പങ്കെടുത്തവരിൽ, ബിജെപി ഹിന്ദുവും, സി പി.എം ഹിന്ദുവും, കോൺഗ്രസ് ഹിന്ദുവും ഉണ്ടു്. ഓരോ മുന്നണിയിലേയും കേവല ഭൂരിപക്ഷം ഇപ്പോഴും ഹിന്ദുക്കൾക്ക് തന്നെയാണല്ലോ. അപ്പോൾ അവർക്ക് പൊതു താൽപ്പര്യമുള്ള, നാടിൻ്റെ സംസ്ക്കാരവുമായി അഭേദ്യബന്ധമുള്ള കുംഭമേള പോലുള്ള ആഘോഷങ്ങളെ ഓരോ മുന്നണിയും എങ്ങിനെ കാണുന്നു എന്നറിയാൻ താൽപ്പര്യമുണ്ട് എന്ന് സ്വാമിജി പറഞ്ഞു. 2027 ലെ നാസിക്ക് കുംഭമേളയ്ക്ക് ഓരോ മുന്നണിയും അതിൽ പങ്കെടുക്കാൻ ആഗ്രഹമുള്ളവർക്കായി എന്തൊക്കെയാണ് ചെയ്യുക, എന്ന് പ്രകടനപത്രികയിൽ പ്രഖ്യാപിച്ചുകൊണ്ടാവട്ടെ അടുത്ത തിരഞ്ഞെടുപ്പ്. ദേശീയ മുഖ്യധാരയിൽ നിന്ന് കേരളം ഒഴിഞ്ഞു നിൽക്കുന്നത് കേരളത്തിൻ്റെ സാംസ്ക്കാരിക - സാമ്പത്തിക പുരോഗമനത്തിന് വിലങ്ങുതടിയായി നിൽക്കുമെന്നും സ്വാമിജി വിലയിരുത്തി.

കർമ്മ സന്യാസത്തിൻ്റെ വഴിയിൽ സഞ്ചരിക്കുന്ന ജൂന അഖാഡ കേരളത്തിൽ പ്രവർത്തനങ്ങൾ തുടങ്ങുമ്പോൾത്തന്നെ രാഷ്ട്രീയ പാർട്ടികളോട് അവരുടെ നിലപാട് വ്യക്തമാക്കാനായി ആവശ്യപ്പെടണമെന്ന് കുംഭമേളയിൽ സ്വാമിജിയുടെ നേതൃത്വത്തിൽ നടന്ന മലയാളികളുടെ സത്സംഗം തീരുമാനിച്ചു.

ജൂനാ അഖാഡ ഇനിമുതൽ കേരളത്തിലും!

ഒരു കയ്യിൽ മാലയും മറുകയ്യിൽ ഭാലയുമായി സനാതനധർമ്മത്തെ നായിക്കുവാൻ ആത്മീയതയുടെ കർമ്മകാണ്ഡം എന്തെന്ന് നമ്മെ പഠിപ്പിക്കുവാൻ സ്വാമി ആനന്ദവനത്തിന്റെ നേതൃത്വത്തിൽ കേരളത്തിലും ജൂനാ അഖാഡ പ്രവർത്തനമാരംഭിക്കുന്നു. സ്വാഭിമാനികളായി എല്ലാ രാഷ്ട്രീയങ്ങൾക്കും ഉപരി ഭാരതത്തിന്റെ മുഖ്യധാരയിൽ നിന്നും പുറം തിരിഞ്ഞു നിൽക്കാത്ത യുവജനങ്ങളുടെ കൂട്ടായ്മയാണ് അല്ലെങ്കിൽ ഒരു പഠന-പ്രവർത്തന കളരിയാണ് ജൂനാ അഖാഡ.

ഇപ്പോൾ കേരളം മുഴുവൻ മഹാമണ്ഡലേശ്വർക്ക് സ്വീകരണം നൽകിവരുന്നു. കേരളാ ഗവർണർ അദ്ദേഹത്തെ ഔദ്യോഗികമായി സ്വീകരിച്ചു.